Måleprogram

Frontposisjonen, farten til isen og høgda til breoverflata er tre faktorar som endrar seg frå år til år. Endringane vil til ei viss grad vere i stand til å gjenspegle klimaendringar. Det er desse tre faktorane som skal bli kartlagt med jamne mellomrom, men på grunn av veret eller andre grunnar må ein rekne med at ikkje alle tre måleprogramma kan gjennomførast fullstendig kvart år. Resultata frå ekspedisjonane blir presentert i utstillinga på Norsk Bremuseum og på prosjektet sin vevstad.

Sidan arbeidet på Tunsbergdalsbreen skjer innanfor Jostedalsbreen nasjonalpark sine grensar er all aktivitet avtalt med Statens naturoppsyn (SNO) og Fylkesmannen i Sogn og Fjordane. Fylkesmannen har i fyrste omgang gjeve løyve til arbeidet fram til 2012.

Frontposisjon

Posisjonen til brefronten blir kartlagt ved hjelp av faste markeringar i terrenget framom breen. Arbeidet blir utført med kompass, laserstyrt avstandsmålar og GPS.

Farten til isen

Farten til isen blir målt ved hjelp av rekkjer med merka stein på fleire profilar på tvers over breen. For å sikte inn profilane og finne dei igjen året etterpå er det faste markeringar på fast fjell på begge sider av breen. Kvart år vil det bli lagt ut nye steinrekkjer, og ved å måle avstanden til steinrekkjene frå fjoråret, som har følgd isen nedover dalen, kan farten til isen bli kartlagt. Til desse målingane treng ein GPS-utstyr, steinar, laserstyrt avstandsmålar og maling.

Høgda til breoverflata

Høgdemålingane blir utført årleg på den nedre delen av breen, og meir uregelmessig i minst to etterfølgande år mellom likevektslinja (snøgrensa om hausten) på 1200 moh og ned til om lag 900 moh. Av utstyr trengst det ein landmålings-GPS som målar posisjonen svært nøyaktig. GPS-målingane vil bli utført på mange ulike punkt på breoverflata som gjer det mogleg å kartleggje overflata. Ved å samanlikne resultata frå år til år kan ein sjå kor mykje høgda til breoverflata endrar seg.

Ved hjelp av data frå dei tidlegare ekspedisjonane vil ein også kunne rekne ut kor mykje breen sin tjukkleik har endra seg sidan 1950-talet.

Fotografisk dokumentasjon

Frå 1950-talet finst det fotografiar av Tunsbergdalsbreen teke frå utsiktpunkt søraust for breen. Desse skal takast igjen kvart år frå same plassen for å dokumentere endringar i breen si utsjånad også fotografisk.